DABA Youth Director, Toshi Longkumer, Associate Pastor kümogo

DABA Youth Director tejenba aser Associate Pastor tasenba, Wb. Toshi Longkumer aser kibong den teintet lanurtem kar noksa nung angur. (Sept. 5, 2016)

Dimapur, September 04(TYO): Dimapur Ao Baptist Arogo (DABA) nung Youth Director, Wb. Toshi Longkumer tanü Deobar nü nungi DABA nungsa Associate kümogo. Pa lanurtem ketdangsüba mapa nungi sannüker mapai aiba mapa agizükba sentong ka tanü temoatsü sentep sentong nung agia liasü.
Pa ya Ungma nunger aser 2002 küm nungi DABA nung lanurtem den inyaka aruogo. Tanü nikongdang pa den tepila sentep sentong ka lanurtemi ayongzüka akadang, ” pa ya sempet aika aketba lanur tanishir ka liasü. Pa mapang nung sentepi maruba lanurtem saisapong sentong ajanga Tsüngrem temeim angatetdakja inyak aser ano lanurtem dang pei teka aser tekolok amshia mapa inyaktsü asoshi tesayuba agütsüba sentongtem tapu balala ayongzüka agiogo,” ta lanurtemi pelaba metetdaktsü.
Tang pa ya Asia pacific Baptist Youth Association nung Executive member lir aser Baptist Youth Fellowship Dimapur nunga pa tir lir.
Tanü iba sentong temer külen DABA nung lanurtem rongnung peisasa mapa tapu balala tenzüka inyakertem (entrepreneurs)-i tarur ajak süngo jemdaktsü.
DABA nung tang sannükba mapai aiba Wb.Toshi Longkümer melen Associate Youth Director Jungshimanen Director kümogo. Tang ya DABA Youth ministry nung tenüng agüja alir lanur ajak ajak 3298 lir.
Tanü Deobar nü DABA Youth Director den tepila sentep sentong nung Dimapur Area nung aliba Ao Baptist Arogotem nungi Youth Director-temi anir Wb.Toshi Longkumer Youth Director inyakdang inyakaa arur teintet lanurtem, tsüraburtem den lanurtem aika dena shilem tajung agiogo.