Dabangg 3 nung Nach Baliye 9 akokeri shilem agitsü

Luroi/August 7, 2019 (Agencies): Osang ajanga ashiba agi tang sayua aliba show, Nach Baliye 9 takoker, Salman Khan indang nüngtugu film franchise – Dabangg 3 nung shilem agidaktsütsü. Nach Baliye 9 ya Salman-i produce asür.
Mumbai Mirror sangdong ka ajanga ashiba agi, Dabangg 3 nung ken balaka alitsü koba tang agia aliba reality show ya tembangba sülen tangoktsü aser takoker nem iba ken nung shilem agidaktsütsü. “Salman-i pa indang team den iba sentong lemsatepogo. Iba show metembangdang par team-i September ita tatem tashi nungbo film teyukabo tangoker alitsü sentong lir. Iba ken ya November ita tangoktsü,” ta source ajanga metetdaktsü.
Maneni Dabangg 3 nung Mahesh Manjrekar’er jala tanutsüla Saiee mezüng film nung shilem agiba angutsü, shiba college mapang Chulbul Pandey (Salman) tetong ama adoktsü. Sonakshi-i maneni Chulbul kinungtsü shilem agitsü.
Dabangg 3 ya Prabhudheva-i direct asütsü aser Arbaaz Khan-i produce asütsü. Iba film ya taküm Christmas anogo sayatsü renema lir. Film nungsa Arbaaz, Mahie Gill, Dimple Kapadia, Sudeep aser Mahesh Manjrekar nungeri tongti shilem agiba angutsü. Film nung Chulbul nisung tamajung aliba nungi teyarinü police ka akümba indang otsü sayutsü.