Dabangg 3 oshi pezü nung December 20 nü sayatsü

Luroi/August 22, 2019 (Agencies): Salman Khan-i social media ajanga pa indang taruba film Dabangg 3 sayatsü metetdaktsüogo aser iba ajanga fan tem kanga pelateper. Paisa iba film ya oshi pezü nung sayatsüba sangdongogo. Twitter nung Salman-i Prabhudheva den külemi tangokba noksa ka den iba osang metetdakja liasü. “Chulbul Pandey December 20 nü nenokdangi Hindi, Kannada, Tamil aser Telugu oshi nung arutsü,” ta pai tweet asü.
Iba noksa post asüba sülen tang tashi nung Twitter nung likes meyirejang temen jungogo aser iba den nisung aikati parnok tebilemba lemsatepogo.
Salman Khan aser Sonakshi Sinha na tang Jaipur nung Dabangg 3 tetangokdak lir aser tenati film indang set nung tangar dang nungi balaka sotetba tanurtem den mapang indokogo. Actress Bina Kak-i la indang Instagram account nung iba indang noksa ka lemsatepogo aser iba ajanga actor aser fan tem aika mulung koktetogo.
Actor-isa Jaipur nung film tangokba mapang od ka den tangokba video ka lemsatepaba den “”Sultan den #rajasthan nung #dabangg3 tangoker,” ta zülutsü.
Dabangg 3 koba Prabhudheva-i direct asür iba film nung Sonakshi Sinha, Arbaaz Khan aser Mahie Gill nungeri taoba mapang parnok shilem maneni agiba angutsü aser kasa mapang nung Kannada actor Sudeep-i antagonist shilem agitsü.