DACYP senden amen

Tuensang, Yimpoksüi/November 20, 2020 (TYO): Hokolbarnü, DC Conference Hall nung Nehru Yuva Kendra kübok District Advisory Committee on Youth Development senden ka ayonga agiogo, kong Deputy Commissioner Tuensang, Kumar Ramnikant IAS-i menden liasü, ta sangdong ka ajanga metetdaktsü.
Iba senden nung DC-i anir District administration, Principal Sao Chang Government College & Polytechnic Sedem, Vice Principal ITI, Youth resource Dept, Lead Bank Manager, ECS, NSS, NCC aser Bharat Scouts & Guides atema Nodal Officer, NYC aser Students’ Union nungi teshimtet nübu tem denogo.
Kishor Verma District Youth Coordinator NYK Tuensang-i senden nung adenertem dang Nehru Yuva Kendra Sangathan mapatong, nükla aser wadang indang tongmelang agi rasa ashi. Kasa mapang, pai iba sentong dak sendakba ajak tarensen agi telok dang metetdaktsü.
DC Tuensang-i, lanur talisa yimtsüng nung alirtem lanurtem dang iba mapatong angatetdaktsütsüla, ta külem sendaktepa alirtem ajungshi, kechiyong India ya tang ang renloka aoba linük ka asünung iba ama sentong ya lanurtem atema kanga dang tongtibang aser parnok atema tajangzük asütsü, ta pai ashi.
Project sentong tem takok ngua amenoktsü atema, Tribal students’ Unions aser tanga telok den longjemer inyaktsü asoshi DC-isa NYKS Tuensang ajungshia liasü.
Maneni, iba senden nung lanurtem atema skills programme tem ayongzüktsütsü aser tanga onüktem nung telok sensaksemogo, ta kasa sangdong ajanga metetdaktsü.