Dadri ama tatalokba ajanga BJP aser NDA jenjang raksatsü: Manohar Parrikar

Panaji (Goa), October 12 (Agencies): Union Defence minister Manohar Parrikar-i, Dadri nung loktii nisung tepsetba tatalokbatem amala ajanga BJP aser NDA jenjang mejungi akumtsü, ta ashi.

Yasüng tesü Panaji anasa sentong ka nung nüburtem den jembiba mapang Parrikar-i, yimtenren nung tajangzük angutsü atema tatalokba karbo tera tali jembiloka aor, ta ashi.

Dadri nung atalokba dak sentakba tasüngdangba ka langzüdang pai, “Ni bilemer, item ama tatalokaba ajanga BJP mesüra NDA jenjang mejungi akumtsü. Iba ya ajangasa Ato kilonser’er mangdang raksatsütsü, anungji ibaji BJP mesüra NDA mesüra linük tejangraba ka masütsü,” ta ashi.

Taoba ita Dadri nung Mohammad Akhlaq-i nashi shi achi ta tai tonglokba loktii pa teseptba sülen iba dak sentakba nung Ato kilonseri mejembiba atema aikati tasüngdangba aliba mapang ka nung Parrikar-i item telangzüba agütsüogo.

Uttar Pradesh nungi Rajya Sabha MP Parrikar-i, “Khenkhenbo o alia jembiatoker. Ni iba ya tatalokba ka indang jembir masü saka item onük ya atangji nung ataloker, iba ya national onük ka kümdaktsütsü atema yimtenren lenir kari national coverage agütsür,” ta ashi.

Tamangba lokti balala tsüngda rara adokba nung Rashtriya Swayamsevak Sangh (RSS) sentaktepa lir ta aitsüba dak sentakba nung Parrikar-i Hindu right-wing tentet RSS metenja jembiba den külemi pa-a RSS züngsem ka lir, ta ashi.

“Ni lanuwa nungi RSS nung ajang-ajanga lir, item ya RSS den sentaka mali ta ni nenok dang züngpong ashir,” ta Parrikar-i ashi.

Paisa, rara adokdaktsürtembo magizüktettsü aser iba nungji pa aser RSS tangatetba kasa lir, ta ashi.

Right-wing Hindu tentettemi linük tesem ajunga nung nashi shi nokdangtsü atema akhangba dak sentakba nung tasüngdangba ka langzüdang Parrikar-i, iba onük nung anema alibaren, shiruru dang maochiba densema onük aika nung ajemdaker telemtetba ka agitsü nüngdaker, item ajungaji shisadangtsüla aser nübur ajaki agizüktettsüsa sorkari telemtetba ka agitsüla,” ta ashi.

“Ajak tangatetba shisadanga iba onük nung telemtetba ka agitsüla. Ajak taginüba angadangtsüla. Iba ya interview mapang o lemtepba ajanga lemtettsü makoktsü,” ta Defence minister-isa shisem.

You must be logged in to post a comment Login