Dadri nung atalokba ya BJP sentong lir: Samajwadi Party

Lucknow, October 06 (Agencies): Tanü Samajwadi Party-i, Dadri nung loktii nisung tepsetba ya yimtenren nung tajangzük angutsü atema BJP-i kanga junga asameyangba sentong ka liasü ta tai tongloktsüba den külemi, state nung rara adokdaktsünertem dak state sorkari tenük yoka reprangdar, ta ashi.

Akhilesh Yadav’er sorkarisa, nüburtemi atangji aser shitakbaji metettsü atema sorkari Dadri semdangtsü shinga menokdanger, ta ashi.

Senior SP lenir aser Cabinet Minister, Shivpal Yadav-i, “Dadri nung loktii nisung tepsetba ya yimtenren nung tajangzük angutsü atema BJP-i kanga junga atongba sentong ka lir. Nüburtemi ochiji metettsü atema yimtsüng semdangtsü asoshi onoki menokdanger,” ta ashi.

Kechiba SP nungi lenir shiangia iba yimtsüng mesemdang ta asüngdangba langzüdang Yadav-i, “Yangji (yimtsüng) SP-i ajak acha ayanger ta tangari tai metongloktsütsü atema onoki iba ya inyaker,” ta ashi.

“Asür kibong züngsemtemi onok Lucknow nung ajuruogo aser parnok nem sen lakh 45 agütsüba den külemi security aser ki tasen atema teyari agütsüogo. Item ama onük ya onoki yimteren tajangzük atema mamshir saka mapa agi dang inyaker,” ta pai ashi.

“Temsempa prokertem dak onoki tenük yokdar. Parnoki Muzaffarnagar nung rara adokdaktsü aser state tesem kar nunga rara adokdaktsütsü meranger. Iba nungji aibelenba putetra parnok nem temerenshi agütsütsü,” ta SP tongti lenir Mulayam Singh Yadav’er adianu Shivpal Yadav-i ashi.

“Tamangba yimsü ajak yimjung nung alitsü asoshi onoki meranger, aser ibaji anema inyakertembo ozüng takang agi alentsü,” ta pai ashi.\