Dadri tatalokbaji party ka nungi nisung 3 ajanga lir: Mulayam

Lucknow, October 08 (Agencies): Dadri nung nashi tepset ta aija loktii Muslim nunger ka tepsetba ken o dak sentkaba nung tanü Samajwadi Party (SP) tongti lenir, Mulayam Singh Yadav-i, sorkar jenjang majungtsüsa kümaka aibelenertem nem temerenshi tulu agütsütsü, ta shiogo.

SP tongti-i, iba ya yimtenren party ka nungi nisung asemi jilia yangluba sentong tamajung ka liasü, ta aitsüogo.

“Dadri nung atalokba ya mapang jilia yangluba sentong tamajung ka liasü. Nenoki parnok tenüngtemji metettsü. Ni anguba osangtem agi, iba tatalokba ken o dak sentakba nung yimtenren party ka nungi nisung asem densema lir,” ta tanü Yadav-i Lucknow nung osangbenertem dang ashi.

Paisa, “Party nungi teshimtet telok ka Dadri-i yoktsü aser iba sülen nisung asemji jangjatsü. Sorkari takoksa ajurutsüsa süaka tenüngtemji jangjaba sülen temerenshi tulu agütsütsü. Onoki communal force tem makdoktsü,” ta ashi.

Pai ashiba agi, iba tatalokba ya telok ka (Muslim) amokbangtsü atema sentong tamajung yangluba lir. Iba sentong tamajung ya onoki nokdangtsü.

SP sorakri state nung terenlok atema inyakba anema communal force temi sentong tamajung yanglur ta aija Yadav-i, “‘Ajak lungjemer, ajak asoshi terenlok’ ta yimyim agütsüsang, Ato kilonser Narendra Modi aser Uttar Pradesh nungi MP dang iba ya süoki ia bilemdangtsü ni mepishir,” ta ashi.