Dadwal-i Arunachal Angh atema advisor mapa toktsür

New Delhi/Itanagar, February 3 (Agencies): Arunachal Pradesh Angh atema advisor Y S Dadwal-i mapa meinyaktsü atema züluba shidi agizükogo.
Arunachal Pradesh nung President’s rule agütsüba sülen Dadwal ya Angh J P Rajkhowa atema advisor ama inyaktsü shima liasü.
Mezüngbo Dadwal-i pa temang manemba onük nung ajemdaker anogo ishika atema sodi meshi aser ibaji Angh-i temelaba agütsü. Ajisüaka, iba sülen pai Home Ministry dangi advisor mapa meinyaktsü atema shidi ka zülu aser ibaji Rajnath Singh-i agizük, ta Home Ministry otongdar K S Dhatwali-i ashi.
Arunachal Pradesh Raj Bhawan nungi sangdong ka nung, Dadwal temang manemba ajanga anogo ternü atema sodi agiogo aser ano pai anogo pezünü atema sodi meshisem ta metetdakja liasü.
Dadwal ya taoba mapang Delhi Police nung Commissioner inyak aser January 26, 2016 nü pa Arunachal Angh atema advisor inyaktsü shim.
Dadwal melena tawa SSB tekolak menden nungi sodi angur B D Sharma shimogo.
Sorkari Dadwal den külemi Arunachal Angh atema advisor inyaktsü asoshi IAS ketdangser G S Patnaik shim aser pai maneni advisor inyaktsü.
Arunachal Pradesh nung ita ka den tema yimtenren tsütsü mepetmesü adoka aruba sülen January 26, 2016 nü Centre-i President’s Rule alitsü ozüng agütsü.