Daimary apuba ajanga yimjung olemtep nung timtem ajurutsü: NDFB

Kokrajhar, January 29 (Agencies): Guwahati nung CBI Special Court kati Ranjan Daimary aser tangartem aitsüba ajanga India sorkar den yimjung olemtep aliba nung timtem ajurutsü ta National Democratic Front of Boroland (NDFB)-i metetdaktsü.
Ozü lennir Ranjan Daimary aitsüba aser pa tepuokdaki yokra, onoki India sorkar den yimjung olemtep aliba meyipa reprangshimtsüsa akümtsü, ta NDFB general secretary, B Ohnjalu-i shidi ka nung metetdaktsü.
India sorkari yimjung olemtep nung timtem majurutsüsa January 30 nü obendang agütsütsütsü mepishir aser tekaratiba nung NDFB president bail nung chioktsü ayongzüker, ta paisa ashi.
October 30, 2008 nü Assam nung bomb atongtepa pokdaktsüba lendong asoshi yashi CBI Special Court kati Ranjan Daimary aser nisung 13 aitsü.
Ranjan Daimary-i aniba NDFB teloki 2013 nungi India sorkar den yimjung olemtep liyonga arur aser iba mapa nung shilem agitsü atema Daimary nem bail temelaba agütsü.
Daimary ya December, 2009 nung Bangladesh nung apu aser 2010 ket pa India sorkar ket nung agütsü.