Dal seret nung sen 120 dak tema matutsü

New Delhi, April 24 (Agencies): Dal aser azüngken densema menjang nung jenjang tali atuba nokdangtsü aser jenjang dalang agi ayoktsü nükjidong nung Centre sorkari dal aser azüngken timba ser menjang tapu balala seret ton 10,000 agütsütsü tebilemba lir, iba den külemi Centre-i state tem dang dal aser mejang seret ka nung sen 120 dak temai agi ayoktsü memelatsüla, ta tuyuogo.
Centre-i rizünga aliba nungi state temi tur dal seret nung sen 66 aser urad menjang seret ka nung sen 88 agi angutsü, iba sülenbo item chiyungtsütem seret nung sen 120 dak tema agi mayoktsü.
Centre-isa state sorkar tem dang jenjang azüoktsü, menjang rizüngba aser alizükba azüoktsü tuyuogo.
Taseptsütem nung urad dal seret ka nung sen 200 tashi tuogo aser tur dal seret ka nung sen 170 tashi tuogo.
Chiyungtsü balala nung jenjang masetshi-i lir, ajisüaka dal densema menjang chiyungtsütem peria mezüsentetba ajanga jenjang kanga tuogo.
Linük nung 2015-16 küm menjang touzük ton lakh 235 shi nüngdaker ajisüaka iba küm  menjang ton lakh 170 dang züsentettsüa akok.