Dalai Lama Arunachal Pradesh toktsür ogo

Guwahati, April 12 (Agencies): Linük balala nung yimden yimsüsürtem aser lokdi, kija aikati momolungaka Dalai Lama-i hopta junga Arunachal Pradesh semdangba sentong Mongulbarnü tempangogo aser Tawang-i taruba küm January nung arutsü nangzüker pa talidaki ogo.
Buddhist yimsü nung anidaker temi amongba ‘Kalachakra’ benjung tulu nung arua adentsü asoshi Arunachal Pradesh Chief Minister, Pema Khandu-i Dalai Lama jaok. Iba benjung ya Bodh Gaya nung January ita tesüsa munga lir.
“Arunachal Pradesh nung ya 6buba Dalai Lama aso. Chief Minister-i Kalachakra benjung nung adentsü asoshi 14buba Dalai Lama nem tejaokba osang agütsüogo. Aser pai iba sentong nung adeni arutsü asoshi jebiteper ashitsü langzü,” ta CM office ajanga ashi.
Dalai Lama-i Arunachal Pradesh semdangtsü sentong yangluba asoshi China-i mepelaba osang agüja liaka, Tibet nunger temeshi putir-i Guwahati nungi kilometre 500 dak tali bilar aliba Tawang tesem-i feet 13,700 ajungketer aliba Se La ajanga aru. Tawang ya India aser China tsüngta aliba ‘McMahon line’ arrtsü nungi kilometre 37 dang pilar lir aser iba tesem nungi Dalai Lama ya chopper nung Mongulbarnü Guwahati-i ao. Kasa anogo nung sa pa Guwahati nungi New Delhi-i ao aser iba nungi Dharamsala-i ao.
Dalai Lama ya India sorkari amshir, ta China-i ashiba aser pa melena Dalai Lama tasen shimtsü asoshi Beijing-i sentong yangluba tem pai Arunachal Pradesh nung mongzükba mapang aija liasü.
Beijing-i temelaba agütsüra pa tasoli-i meyiba onüba tejangraba, Dalai Lama-i iba mapang shia liasü.
Tawang nung Dalai Lama ya aonung pezü yipzük. China nungertemi 1959 küm Tibet ya par küboki aitdaktsütsü merangba mapang Dalai Lama ya Tawang-i jena aru aser iba tesem ya pa asoshi tanabuba ki, ta züngshir.
Pa Tawang nung amongba mapang anogo asem tashi Buddhist yimsü amanger nisung lakh 1 dak tali dang tamangba yimsü tesayuba agüja liasü aser 6buba Dalai Lama asoba tesem nung yanglua aliba Urgelling monastery semdanga liasü.