Dalai Lama atema China-i ola madoktsüla : Pema Khandu

Itanagar, April 5 (Agencies): India-i China den masü saka Tibet den arrtsüa lir, anungji Dalai Lama-i linük sema senzüba nung China-i India aitsütsü temeten kecha mali, ta Arunachal Pradesh Chief Minister Pema Khandu-i ashi.
“China ji ozü kidanger masü anungji parnoki onok dang kechi inyaktsü mesüra meinyaktsü indang tetuyuba magütsütsüla” ta Khandu-i osangbener dang ashi.
McMahon Line ajanga India aser Tibet tsüngda arrtsü ladangtsür. Iba arrtsü nung kilometer 1,080 agi Arunachal Pradesh kongshia lir.
Arunachal Pradesh nung square kilometre 90,000 shi ka pur lushi ta China-i ashir. Iba onük atema olemtep aiben liogo saka tatembang telemtetba ka magiteti lir.
1959 küm nungi Dalai Lama ya India aser Arunachal Pradesh atema tetushi süa jaoker ka lir aser pai mashii mapang ka nung linük kübok tesemtem sema senzütsü akok, ta Chief minister Khandu-isa ashi.