Dalai Lama-i Arunachal semdangra tesentaktep raksatsü: China

Beijing/New Delhi, October 28 (Agencies): Hokolbarnü China-i, Arunachal Pradesh semdangtsü atema India-i Tibet nunger yimsü lenir, Dalai Lama nem temelaba agütsüra, ibaji ajanga India-China tesentaktep raksatsü aser arrtsülen yimjung raksatsü, ta shiogo.
Arunachal Pradesh Chief minister-i jaokba nung ajemdaker state semdangtsü atema India sorkari Dalai Lama nem temelaba agütsüba sülen iba dak sentakba tasüngdangba ka langzüdang Beijing nung osangbenertem dang China Foreign Ministry otongdar, Lu Kang-i, “Iba osang ajanga onok tebilemtsü akar,” ta ashi.
“China-India anüdoklen arrtsülen China’er tangatetbaji tejangja. Dalai’er nisungtemji China anema inyakba mapatem nung densema lir aser India-China arrtsü dak sentakba onüktem nung ashishitsüsa lir,” ta Kang-i ashi.
“Iba ama tensa ka nung India-China tsüngda mangatettep tesem nung shilem agitsü atema India-i Dalai Lama jaokbaji ajanga arrtsü tesem nung yimjung ang raksatsü aser India China tesentaktepa kongshitsü,” ta pai ashi.
“Tibet dak sentakba onüktem nung India-i yimtenren akhümtsübutsüla aser arrtsü onük nung telemtetba akhümtsübutsüla,” ta China ketdangserisa ashi.
“Iba onük tebenjaba akumtsüsa India-i kecha meinyaktsüla. Ibaji ajanga dang asen tesentaktep aintsü,” ta pai ashi.
India External Affairs otongdar, Vikas Swarup-i, taoba mapang nunga Dalai Lama-i Arunachal semdangogo ta jembiba dak sentakba nung Kang-i, “Khen aibelena inyakra, iba tetezü ano aibelena inyaktsü ta mali,” ta ashi.
China-i Arunachal ya southern Tibet shilem ka lir ta ashir aser mapang shia Dalai Lama, India nung lenirtem aser bendanger ketdangsertemi iba state semdangbaji China-i ashishia arur.
Sangküm Dalai-i hopta ana Arunachal semdanga state nung tesem aika sema senzütsü.
Tawa US Ambassador, Richard Verma Tawang Festival nung adentsü atema Arunachal semdangba-a China-i aija liasü.