Dalai Lama nem Bharat Ratna agütsütsüla:BJP MP Shanta

Dharamsala, November 01 (Agencies) : Tang BJP MP teinyakdak aser tesüiba mapang Union Minister Shanta Kumar-i linük sorkar dang Tibet nunger tamangba nung lenir Dalai Lama nem Bharat Ratna agüja tushitsüla, ta Mongulbarnü Dharamsala nung pa kaket ka sayaba sentong nung ashi.
“Himalaya Par Lal Chhaya” kaket sayar o jembiba mapang Kumar-i, Dalai Lama-i meimchir atema tajung inyakba yari pa nem Bharat Ratna agüja tushitsü langa lir, ta ashi.
Mongulbarnü sayaba kaket ya India aser China na rarazükli mapa, 1962 küm Kumar-i zülu aser küm 50 lir külen ano tanaben menüngshir sayarba lir.
Dalai Lama-i pa ‘India jabaso’ ta ashir aser 1959 küm Tibet nungi alirtem kangshia aritokba mapang pa den parnok yimer aika India nung jenoka lir küm 50 dak tema ajunger.
Tesüiba mapang Himachal Chief Minister, Kumar-i, iba kaket ya mezüng 1965 küm saya, ta ashi.
“Iba kaket sayar küm 50 lir külen ano tang China nungeri linük arrtsülen kechisarena amemoka yangludar aser ibaji India nunger amokmerener amai lir, ta ashi.
Pai, China aser Pakistan na tsüngda tesendaktep tashi ita akümbaji India nunger atema tebilemtsü ka lir, ta shisem.
Dalai Lama-i, “Tamangba yimsü balala jungtepa aliba linükji India ta asenoki tenük kuli angur,” ta o jembidang ashi.
Alimai India meteta akümbaji tebilemba tajung peria aliba ajanga lir, ta pai ashi.
Ni iba linük nung senso ka ama bilemer ta ashidang Dalai Lama-i, pa Himachal Pradesh nung küm 55 dak tema alir, ta shisem.
“Iba mapang piyong India nung sorkar melentepa arudang parnok ajaki Tibet nunger kanga nungiter aser ibaji atema ni iba linük nung aliba nüburtem dang kangasa pelar,” ta pai ashi.
Pai, “Ni kü yimsüsüba tashi 2011 küm melenzüka yutsüogo. Joko Tibet nunger sobaliba kümzüka ayu atema tang ni bilemer,” ta ashi.