‘Dalit’ kin tsür ka college nung taintemi rishi kangshi

Kozhikode, June 21 (Agencies) : Malappuram district nungi Bengaluru college nung nurse azünger Dalit kin tsür ka Mongulbarnü collge nung taintemi rishi kangshiba sülen mozü kidang tasü taküm tsüngda anepalutep. Dalit ya kin tila rongnung ka lir.
Iba tetsür ya Kozhikode Medical College Hospital (KMCH) nung anepaludar aser la temang kanga mejungi lir, ta osang ajanga ashi.
Arishi küm 19 tain, Aswathi ya tang Gulbarga nung aliba Al Qamar College of Nursing nung nurse mezüng semester tezüngdak lir. Tetsür hostel nung May 9, 2016 nü college nung tain kari la merenshia rishi kangshiba mapang metsü meshiba tesem shitokba mozü jemdaktsü aser ibaji ajanga la tasü taküm tsüngda mozü kidangi anir ao. Aji oda süaka la temang nung kecha temelenshi madok aser tamajungba dang aküm.
Mongulbarnü la den külemi azünger ka nem la mindaktsür la kidangi yokogo, ta osang ajanga ashi.
Lar kinungertemi la Thrissur Medical College Hospital-i anir ao aser yangji anogo ana anepaluba sülen June 2, 2016 nü Kozhikode Medical College Hospital (KMCH)-i anir ao. Metsü meshiba tesem shitokba mozü ajemba ajanga la indang chiyungtsü meyokba trokzü (oesophagus) shilem tuluba ka kanga mejungi raksatsogo, anungji la operation tulu agitsü nungdaker, ta KMCH nung tetuyuba agütsü.
Aswathi ya ano Kozhikode nung aliba nija mozü ki kati anir ao aser yangji operation magi tsüngda ita trok anepalumatsü nüngdak ta ashi. Ajisüaka lar kibongi ibaji matutsü kechiba süra lar ya sensaker kibong ka lir. Anungji Aswathi ya ano KMCH-isa meyipa anir ao.
Aswathi-i bank ka nung ‘education loan’ agiogo, ta lar kinunger kati ashi.
La iba college-i mezüng aonü nungi college nung azünger taintemi merenshia rishi kangshitsü tenzük, ta lar kinungertemi ashi.