Dalit lanurtem tepsetba CBI-i bushisüngdangtsüla:Tasür kinungertem

Ahmedabad, August 22 (Agencies) : 2012 küm police-i injang agi kahsetba Dalit lanur asem kinungertemi iba case Central Bureau of Investigation (CBI) nem bendanga agütsütsüla kechiba parnoki police dak temang makar ta ashi.
Gujarat sorkari iba case atema Special Investigation Team (SIT) tentetsü tetuyuba agütsüba sülen lanur tasürtem atema ochi obendang akhanger kinungertemi CBI nem bendanga agütsütsü indang ashi.
Sorkari Honibarnü SIT ka tentetsüaka Gujarat Anusuchit Jati Atyachar Sangharsh Samiti kübok parnoki Gandhinagar, Gh-3 circle nung iba case atema longkaka aitogo. Iba ken o ya CBI nem bendanga magütsüra parnoki ano August 30, 2016 nüa longkak aitsü metetdaktsüogo.
September 2012 nung Thangadh, Surendranagar district kübok Dalit aser Bhadwad telok na raratepba mapang police-i injang akahdang Dalit nunger lanur asem— Pankaj Sumra (arishi küm16), Mehul Rathod (arishi küm17), aser Prakash Parmar (arishi küm 26)—kahset. Police-i parnok dak akahdang AK-47 prangponga dena amshiba bushisüngdang kar ajanga nguteta lir.
Mehul tebu Valji Rathod, tetsü Chandrikaben aser aianu Parul nunger den Prakash tebu Manjuben aser tetsü Geetaben nunger Gandhinagar, Gh-3 circle nung ochi obendang angutsü atema lumitsü tenzükogo
Rathod, “Onoki police dak tamang samaogo kechiba süra onok chirtem parnoki kahset. Sorkari ochi bushisüngdang aginera iba case ya CBI nem bendanga agütsütsüla,” ta sentepa alirtem dang ashi.
Iba case bushisüngdangtsü atema Honibarnü State sorkari Rajkot Police Commissioner Anupamsinh Gehlot, Surat DCP Parikshita Rathod aser Porbandar SP Tarunkumar Duggal nunger dena SIT ka tentet.