Dalit nübur tepsetba atema Rahul-i Haryana sorkar aitsü

Faridabad (Haryana), October 20, 2015: Mongolbar anepongi Haryana, Faridabad nung aliba ki ka nung nisung kari mi senoktsüba lendong nung Dalit kibong ka nungi tanur ana rongsetogo aser tsürabur ana mi agi mejungi yirua lir. Tanur ana tebu, Jitender-i, par kidang mi senoktsübaji Upper caste, Thakur nübur züngsemtemi lir, ta tai tongloktsüogo.

 Faridabad, October 21 (Agencies): Haryana nung BJP sorkari jenjang tekübok nung aliba nübur kümzüka alitsüsa meinyakteter, ta Bodhbar nü Congress tatong Tir Rahul Gandhi-i aitsüogo.

Rahul-isa, Mongolbar nü Faridabad nung Dalit kibong ka ki nung mi senoktsüba ajanga tanur ana asübaji BJP mapatong lir, ta ashi.

Delhi den arrtsü süa aliba Faridabad district kübok Sunped yimtsüng nung Bodhbar nü Congress leniri, Haryana sorkari temzüng ozüng mebenokteter aser Dalit nübur amakba tali züindagi, ta ashi.

Gandhi-i iba yimtsüng semdang aser Upper caste nung telok kati ki ka nung petrol shiloktsür rongtoktsüba ki kibur Jitender ajurua liasü.

Jitender kinüngtsü Rekha, arishi küm pezü jabaso Vaibhav aser arishi ita ti jala Divya mi agi arungba sülen tanur anaprongla süogo, aser tang kinüngtsüji mozükidang yaridar.

Ano külen iba tatalokba anema lungkak aitertemi Kaili yimtsüng nung Faridabad-Mathura lenmang nung tasümang anaji yur lenmang nokdanga liasü.

Lungkak aitertem jagi, nisung 11 anema police nem ken o agüja alir ajakji tangsa aputsüla aser Jitender nem sorkar mapa ka agütsütsüla, ta takhangba agütsür.

Iba tatalokba dak sentakba nung pei mapa nung tamakok aludaktsüba asoshi Sardar Police station tongti densema police tenet aser Sunped yimtsüng nung guard mapa nungi anentsüogo.

Iba tatalokba dak sentakba nung police-i melung melemi nisung asem- Balwant, Kartar aser Guddu nunger puogo.

Rahul dak alia Communist Party of India-Marxist lenir Brinda Karat, taoba mapang Union Minister Kumari Selja, Haryana Jnahit Congress (Bhajan Lal) lenir Kuldeep Bishnoi aser National Commission for Scheduled Castes züngsem Ishwar Singh nungeria iba yimtsüng semdanga takoksa ajurur aliba kibong semdangogo.

Haryana Additional Director General of Police, Muhammad Akil-ia iba tesemji semdanga liasü.

Police-i ashiba agi, iba tatalokba ya October 5 nü Sunped nung rara adoka Upper Caste nungi nisung asem tepsetba den sentaktepa lir.