Dalit nunger dang nungi reservation rakzüktsü makok: Modi

New Delhi, March 21 (Agencies): Opposition party temi tiyazü osang proker ta aija tanü Ato kilonser, Narendra Modi-i, nisung shingaia Dalit, tribal tem aser lokti nung sensakertem dang nungi reservation rakzüktsü makok, ta ashi.
Hombarnü Ambedkar Memorial Lecture sentong nung jembidang Ato kilonser Modi-i, “Vajpayee (BJP lenir) Ato kilonser akümdang aikati joko reservation malitsü ta bilem. Pa anabenren Ato kilonser inyak aser iba amaji matalok,” ta ashi.
“Onok (BJP) sorkar tashi nung alidang Dalit aser tribal nisungtem atema reservation onük nung yamaji kodanga matalok, ajisüaka tang tashi tiyazü osang proker,” ta Modi-i ashi.
Paisa “Ibai shingaia memekazüktettsüsa temeten ka lir,” ta ashi.
“Babasaheb angatettsü atema, nisung kati lokti atema inyaktsüla,” ta Modi-isa ashi.
Dr Ambedkar ji Dalit nunger tekümzüker ka dang masü saka makamaitertem aser timtemertem temeten atema inyaker mangdang aliba lenir ka liasü, ta pai ashi.
Tanü sentong aliba tesem, Vigyan Bhavan nung Modi-i National Ambedkar Memorial yanglutsü atema lung azüngtsüogo.
“Babasaheb mangdang ataloktsütsü atema ni maongka nguogo. 1956 küm pai asenok toktsür ogo. Küm 60 sülen tanübo memorial ya yanglur,” ta pai ashi.
“Küm 60 süiogo. Ni ya koma anga rasa mejembiteter, ajisüaka iba atema asenoki küm 60 atatsüsa aküm. Atangji iba ya kü nem tiaja aliba ka südi. Babasaheb temoatsüji kü dak meküploktsü südi. Ni iba ya April 14, 2018 nü lapoktsütsü,” ta paisa ashi.