Dalit nunger den kibong akümba atema sen lakh 2.5 agütsütsü

New Delhi, December 6 (Agencies): Dalit nunger ka den kibong kümra Narendra Modi’er sorkari sen lakh 2.5 teyari agütsütsü ta osang metetdaktsüogo.
Ajisüaka, ashikülak mapa meinyakdaktsütsü atema senji shilem ana lemsar ang agütsütsü.
“Apuani rongnung ka danga Dalit nunger süra, iba teyari agütsütsü aser tena indang annual income ji küm ka nung sen lakh 5 tema masütsüla ta telatetba agütsüba agiener. Iba scheme kübok income limit kecha malitsü” ta Social Justice ministry kübok Dr Ambedkar Foundation-i state sorkar ajak nem osang metetdaktsü.
Dr Ambedkar Foundation-isa iba scheme nung telatetbatem yanglushiba nung state sorkartemi masü saka district administration-i indangindang Centre den iba scheme atema mapa inyaktsü melenshiogo.
Telatetba tasenba kübok, apuani na kibong akümba sülen sen lakh 1.5 agütsütsü aser iba sülen tena indang joint bank account nung sen lakh 1 enoktsütsü saka ibaji küm 3 sülen ang agizüktettsü.
Iba scheme ya 2013 küm tenzük aser iba mapang sorkari küm nung apuani 500 shi kati iba teyari meshitsü akok ta teimla liasü. Ajisüaka, tesüiba küm asem tsüngda apuani 116-i dang sorkar nungi sen teyari agiogo.