Dalit nunger kaketshir züka merenshirtem apu; School ketdangsertem mapa nungi anentsü

Patna, October 19 (Agencies) : Bihar nung Dalit nunger tanur ka par class purtemi züka merenshiba aser par tesayurtemi pa meyari ta kuli agütsüba sülen Centre sorkari iba school staff tem merenshiogo.
Bodbarnü iba school principal mapa nungi anentsüogo aser Muzaffarpur nung aliba school nungi staff 14 tashi mapa belenogo. Tanubosangjia pai züngnüba Kendriya Vidyalaya mesüra central government-run school mashi ka nung züngdaktsütsü atema shiogo, ta Bihar nung BJP lennir Sushil Kumar Modi-i metetdaktsü.
Adianu anati arishi küm 16 tain tebur chanu züka merenshibaji video nung menüngok aser taoba hopta tu  social media nung sayua liasü. Iba video ji kanga belenshiba sülen tanubosang dak azükertemji atsükadok, saka police-i tena puogo aser school nungi anentsüogo. Iba onük bushisüngdangtsü atema sorkari education aser tanga department nungi ketdangsertem yok.
Tanubosangi ndtv.com indang blog ka nung züluba nung, “Ni, Dalit nunger ka lir aser examinations mesüra academics nung takok ngua arur, iba ya ajanga kidangbo ni tenüngsang angur, saka classroom nungbo maaksü ajurur aser züka merenshidaktsür” ta shia lir.
Video nungji pa classroom menden nungi atsüzüker aser tejak nung maoktsür, tekolak nung akor aser tetsüng agia ajemshir. “Iba video ya ajanga tatalokbaji police ken o ka aküm, video ji August 25 nü tangokba lir. Tena rongnung kati, kü dak azükdang pa jangra atemer ta ashi aser pai tangar ka nem video ji tangokdaktsü” ta tanubosangisa zülua lir.
Pai temulung alemba tesayur ka dang iba tatalokba ashi aser tesayur jagia pa aria bilemtsüba metetdaktsü, saka tesayur jagi pa dang iba asoshi ken o kecha mebenoktsüla ta ashi.
Adianu ana tebuji sentsüh aketer nisung ka lir aser school-i pa anema kecha meinyaktettsü, anungji ni ken o benokra, ni school nungi anentsüsa akümtsü ta kü tesayuri kü dang ashi, ta tanubosangisa shisem.