Dalit nunger onük nung Ato kilonseri ola adoktsüla: Mayawati

New Delhi, July 25 (Agencies): Dalit nungertem anema inyakba onük nung Ato kilonser, Narendra Modi-i ola madoker ta shia Hombarnü BSP tongti, Mayawati-i, Centre nung BJP sorkar tashii aruba sülen Dalit nunger anema inyakbatem kanga bulua kümogo, ta ashi.
Tawa Gujarat, Una nung nashi kümzüker telok kati Dalit nunger lanurtem dak azükba tatalokba dak sentakba nung tanü Parliament kima Mayawati-i, “Nashi kümzükba nüngtem nung Dalit nungertem reshikangshir,” ta ashi.
Mangaluru Deputy SP, M K Ganapathy soseta asüba dak sentakba nung Mayawati-i, Dalit nunger aser tepetzük tia nung alirtem anema inyakbatem kanga  bulua kümogo, iba den sorkar mapa nung alirtema soseta asür, ta ashi.
“Iba den kasa Maharashtra nunga Dalit nunger lanur ana motorbike nung aodang parnoki gari ka ajangteta ao. Gari ka ajangteta aobaji gari lenmang yimya. Ajisüaka tena anendaktsüba sülen tena reshikangshi. Kodang tena ket nung Baba saheb (B R Ambedkar) indang noksa ka angu, ano taliba reshikangshi. Maharashtra nung BJP sorkar tashi nung lir,” ta BSP tongti lenirisa ashi.
“Uttar Pradesh nung Dalit nungertem anema inyakba kanga züindar. Centre nung BJP sorkar tashii aruba sülen linük tesem ajungalen ibaji atalokdar,” ta lai ashi.
Sangküm Uttar Pradesh nung assembly elections agitsü aliba temelung nung yur Mayawati-i Dalit nunger anema inyakba tatalokbatem nung ajemdaker Centre sorkar sashia aitsüdar.
“Linük tesem ajungalen iba ya atalokdang Ato kilonser, Narendra Modi-i ola madoki malitsüla. Pai jembitsüla. BJP-i yimsüsüba state tem nung iba ya kanga bulua atalokdar. Ajisüaka Ato kilonseri ola madoker,” ta lai aitsü.
“Item tatalokbatem atema pai tebilemtsü makar ama reprangteter. Gujarat tatalokba dak sentakba nung Ato kilonseri jembitsü, ta onoki imlaa liasü, ajisüaka pai mejembi. Iba tatalokba nung pai jembitsü anünga lir,” ta laisa shisem.