Dalit nunger tepsetba ken o nung Delhi HC-i nisung 33 aitsüogo

New Delhi, Luroi/August 24 (Agencies): 2010 küm Haryana, Hisar district kübok Mirchipur yimdak Jat nungertemi Dalit nunger arishi küm 60 tambur ka aser par jala ka rongsetba ken o nung tanü Delhi High Court-i nisung 20 aitsüogo.
Court-isa iba ken o nung aija alir nisung 13-i temepishiba agutsüba magizük. Iba ken o ya Scheduled Castes anema inyakba lir, kechiyong iba tatalokba ajanga Dalit nunger kibong 254-i Mirchpur yim toktsür ajen.
Justices- S Muralidhar aser I S Mehta nati akumba bench-i, India nunger nüchiso anguba sülen küm 71 nunga temaba jenjang nung alirtemi Scheduled Castes anema inyakba tatalokba ajema makümer, ta ashi.
Iba ken o nung Delhi HC-i aibelener nisung 33 nungi nisung 12 taküm piyong tepoukdak ayutsü obendang agutsü. IPC kübok nisung tepsetba, SC/ST pur mi aser tapoktsü oset amshia amakba, SC/ST (Prevention Of Atrocities) Act kübok Scheduled Caste mesüra Scheduled Tribe pur kiojen raksatsütsü nükjidong nung inyakba ken o tem nung parnok aitsüogo.
Obendang agutsüba mapang nung bench-i, “Iba tatalokba ya 2010 küm April 19 nungi 21 tsüngda atalok. Iba tatalokba ya ajanga Dr B R Ambedkar-i November 25, 1949 nü India nunger Temzüng tatembangbuba draft Constituent Assembly nung benokba mapang ashiba ama ‘India nunger lokti nung langka anati mabensa’. Kaji ‘equality’ aser kaji ‘fraternity’ lir,” ta ashi.
Court-isa, iba ken o nung aija alirtem dang nungi senchi achiba senji takoksa angurtem nem teyari agutsütsü atema Haryana sorkari amshitsü, ta metetdaktsü.
Kasa ken o nung aija alir nisung 13-i trail court kati obendang aguja aliba anema temepishiba agüja liasü, ajisüaka high court-i magizük.
Takoksa angurtem aser police-ia high court dang aija alirtem nem temerenshi tuluba agutsütsü mepishia liasü.
September 24, 2011 nü trail court-i iba ken o nung Jat nunger nisung 97 nungi nisung 15 aija liasü, ajisüaka parnok rongnung nisung anabo süadok.