Dalit shisashir ka soseta asü; Union minister anema ken o benok

Delhi/Hyderabad, January 18 (Agencies): Hyderabad University Hostel nung Dalit nunger Ph. D shisashir Rohith Vemula soseta asüba sülen Hombar nikongdang Human Resource Development Ministry (HRD) nung lokti adenshia lungkak aita liasü.
Iba ken o dak sentakba nung SC/ST Act kübok Union Labour Minister, Bandaru Dattatreya aser Hyderabad University Vice-Chancellor na anema ken o ka benokogo.
Tanü osangbener den jembidang Gachibowli Inspector, J Ramesh Kumar-i, “Kaketshir kari ken o agütsüba nung ajemdaker onoki parnok anema ken o benokogo. IPC kübok section 306 (soseta südaktsütsüsa inyakba) aser SC/ST Act nung FIR benokogo. Bandaru Dattatreya (Union minister), Vice Chancellor Appa Rao, MLC Ramachandra Rao aser kaketshir- Susheel Kumar aser Rama Krishna nunger tenüng FIR nungji zülua lir,” ta ashi.
2015 küm Dattatreya-i HRD Ministry dang shidi ka ajanga, Rohith den Dalit kaketshir pezüi Akhil Bharatiya Vishwa Parishad (ABVP) züngsemtem dak azükba atema par pongu nem temerenshi agütsütsüla, ta mepishia liasü.
Ajisüaka Dattatreya-ibo, “Ni züluba shidiji Dalit nunger shisashir ka soseta asüba ken o den sentaktepa mali. Nisung tamajunger kari Akhil Bharatiya Vishwa Parishad züngsemtem anema inyakba ajanga ni iba shidiji zülu. Ni anema benokba ken o nung ni kecha mejembiner,” ta ashi.
Yaküm August ita nung ABVP nung inyaker kaketshir ka dak azük ta tai tongloktsüba dak sentakba nung University nungi Dalit nunger kaketshir pongu aritok aser parnok rongnung Rohith densema liasü.
Osang ajanga ashiba agi, Rohit ya tesüiba küm ana tashi Science technology & society studies nung Ph.D agia liasü.
Kaketshir ponguji administrative building, hostels, libraries, mess aser kaketshirtem adenshitak tesemtemi aotsü memelaba ajanga kaketshirtemi lungkak sashia aita liasü.
Iba sülen University telemtetba anema raratsü atema parnoki Joint Action Committee tentet.
Aji oda Deobar nikongdang kaketshirtem lungkak aitba mapang Rohit NRS hostel telung jagi itet, iba sülen pai telunglen nungi kishi shibanger lisü agi alenseta asü.
Iba dak sentakba ken o nung Hombarnü HRD Minister Smriti Irani-i jembitsü memelungi, lai yimtenren sangdong kecha magütsütsü ta ashi.
CNN-IBN den jembidang Irani-i, “Ni yimtenren sangdong kecha magütsüner, kechiyong temzüng-ozüngji state sorkari benoker,” ta ashi.
Laisa, sorkari India nung aliba University tem ketdangsübaren nung amouka meinyaker. “Iba ya yimtenren nung tai tongloktsüteptsü mapang ka masü. Iba ya tia maka tatalokba aser ni jabaso asüba kibong den asüko lemsateper. Onoki ministry nungi züngsem anati akumba team ka University of Hyderabad-i yokogo, aser parnoki bushitetbaji onok nem metetdaktsütsü,” ta ashi.