Dalits atema inyaktsü; UP nung terenlok atema tokteptsü: Modi

New Delhi, September 02 (Agencies): Tanü Ato kilonser, Narendra Modi-i, Uttar Pradesh densema state balala assembly elections nung BJP-i terenlok onüktem nung ajemdaker tokteptsü, ta metetdaktsü.
BJP-i lanurtem nem mapa, yimjung aser telongjem asoshi inyaktsü, ta paisa ashi.
CNN-News 18 news channel den interview agidang Modi-i, “Uttar Pradesh nung vote agütsütsüpurtemi terenlok onüktem nung ajemdaker vote agüja majority sorkar ka shimtsü ni imlar,” ta ashi.
“Taruba anogotem nung state pongu nung election agitsü, aser item rongnung Uttar Pradesh densema lir. BJP-i terenlok onüktem nungang ajemdaker tokteptsü. Onoki aluyimertem, yimtsüngtem, lanurtem atema mapa nung rangloker inyaktsü,” ta ashi.
“Onoki linük nung yimjung aser telongjem alitsü asoshi rangloker inyaktsü. Iba dak sentakba nung onoki meratem agitsü aser tejakleni aotsü,” ta paisa ashi.
Ato kilonseri ashiba agi, taoba Lok Sabha election nung “vote-bank politics” maliasü saka terenlok politics liasü.
“Küm 30 sülen asen lokti nung aikati majority sorkar ka atema vote agütsü. Asen lokti nung temelenshi ka adokogo. UP tajungba akumtsü atema UP nüburtemia kasaji inyaktsü imlar. Parnoki temelungjang nung terenlok bilema vote agütsütsü imlar,” ta Modi-i ashi.
Sangküm küm tetenzüklen Punjab, Uttarakhand, Goa, Manipur aser Uttar Pradesh assembly tem atema elections agitsü.
Modi-isa, pai Dalit nunger atema inyaktsü, ta ashi.
“Pei sasa tanüker ama sayua linük nung telemsa adokdaktsütsü merangertemi, Modi Dalit nunger den lir ta asübaji maginer. Modi-i tribal nüburtem atema inyaker. Ni Dalit nunger, ajemzüka alirtem, maongka tajung mangurtem atema inyaker,” ta pai interview nungsa ashi.
“Pei yimtenren nung tetsükdaktsü ka ama reprangtetertemi iba ya anemer, aser parnoki lendong atalokdaktsür. Ibaji ajanga parnoki kuli makai aitsür,” ta Ato kilonseri ashi.
Gujarat nung nashi kümzükertemi Dalit nungertem anema inyakba tatalokba balala nung ajemdaker opposition party temi Ato kilonser, Narendra Modi aser Bharatiya Janata Party (BJP)-i aniba Centre sorkar kanga aija aruogo.