DALT aser AKTD nati asür Lanunukshi tepsetba aitsür

Dimapur, March 25 (TYO) : March 20, 2017 aonung D.C office, Dimapur anasa Mongsenyimti nunger asür Aozulu’er jabaso Sp. Lanunukshi Pongen memetetba nisung kari taochi melii shiruru yimya nung tepseta yutsüba kanga sashia aitsür, ta Dimapur AO :Lanur Telongjem aser Ao Kaketshir Telongjem Dimapur nati sangdong balala ajanga metetdaktsü.
DALT-i, ozüng amer aser ketdangsertemi item nisung tepsetertem akoba tashi tekaratiba nung pua tapet temerenshi agütsütsü akhanger. Ochi obendang mangu tashi iba asoshi bushisüngdangba maparen ajak nung nungita yaritsü aser iba den külemi onoki ano asür kinungertem den asüku lemsateper, ta parnok sangdong ajanga ashi.
AKTD-ia sobaliba dak maketba inyakyim aser yimya ya asen lokti nung tagizüktettsü mapa masü. Tang tashi nisung tepsetertem mepui aliba angashia kanga sasar aser aji nüburtem asoshi lendong lir. Anungji asür Lanunukshi. Pongen tepseter nisungtem tekaratiba nung pua ochi obendang agütsütsü mechi nung iba tetsübutsü tatalokba tenük kuli angurtemi marendaki ozüng amertem nem osang agütsütsü mepishir, ta parnok sangdong ajanga metetdaktsü.
Asür kinungertem den asüku lemsateper aser tulusang Tsüngremi par kibong nem tashi tasen den tesüneptsüba agüjangma, ta Union-i sangdong ajanga lemsatep.