DALT-i Dimapur Police nem tenüngsang agütsür

Dimapur nung telidak Molungyimsen tsür kaketshir arishi küm 22, Tasenjungla tepsetba ken o nung tongti tai tonglokja alir, Sanjay Lodh mapang shidak nung apuba atema Dimapur Ao Lanur Telongjem (DALT)-i Dimapur Police nem tenüngsang agütsür. Kr. Tasenjungla tasümang ya July 12, 2019 nü police-i Chumoukedima nung aliba Green Timber Mill anasa tzübo ka nung angu.
Asür Ajungla ya lajar ka liasü aser la teyi tantsüla den telidak liasü. Elementary studies sülen lai part time mapa ka ama nija company nung teinyakdak liasü. Asür Ajungla ya kanga tesadok nisung ka aser temeim aketba nisung ka liasü, aser lai nursing studies aginüa liasü. Tongti tai tonglokja alisang asalentong tamajung ajanga la anojungi arishi tembangtsüogo.
DALT-i bangdakpurtem dang kechi südir süaka tai tonglokja alisang, Sanjay Lodh nem bail magütsütsü atema akhanger. 2018 küm November 15 nü Ao Senso Telongjem Dimapur (ASTD)-i bangzüng renema aliba nung ajemdaker DALT-i züngsem kar anema aibelen tulu inyakertem magizüktsü aser ochi obendang angutsü atema tatem tashi inyaktsü.
Sd/-                                                                              Sd/-
(Aotemsu Aier)                                                         (S.Pangertoshi)
President                                                                    General Secretary.