DALT-i sorkar dang tebilemtsü aika lemsateper

Dimapur, May 11 (TYO): Nagaland state sorkari tangalen anendaka alirtem anir arutsü merangba atema tenüngsang agütsür ta Dimapur Ao Lanur Telongjem (DALT)-i sangdong ka nung metetdaktsüogo.
Nagaland adena orr anendaka alir teimba ka kaketshirtem lir aser parnok kanga timtemdar. Ajisüaka, iba nung tebilemtsü ka lir kechiyong tangalen nungi arur teimba ka Dimapur ajanga arutsü aser yangi dang quarantine asütsü. Anungji state sorkari mapang tatsüka tsüngda nisung meyirjang aika quarantine asütsü asoshi koba tashi renema lir, ta DALT-isa sorkar dang asüngdangogo.
Social media sabang balala nung tangalen nungi arurtemji quarantine facility nung pei pei kini anepalutsü ta osang angazüker. Iba ya shitak süra, parnok anenzükdaktsüba aser chiyungtsü koma agütsütsü. Sorkari quarantine facility ajak nung nüngdakba infrastructure aser facility tem agütsütsüla aser senotsü endokba ajak sorkari agütsütsüla. Anungji, iba maparen nung metokmeperi aser ratatepba malitsü atema sorkari sentong tajung ka renemtsüla, ta DALT-isa metetdaktsü.
Külen, state sorkari Nagaland sasep nung district balala nung anendaka alirtemi pei pei talidaki aotsü atema mapa inyakba asoshi tebilemtsü abener. Telok aika dang pei sasa garitem anepalutsü ashir aser bus gari peria maliba ajanga tetsükdaktsü tulu ajurur, ta DALT-isa ashi.
Sorkari garitem bendena itemji telok balala nem para jenjang dalang agi agütsütsüla ta onoki tebilemba ka shidanger. Talisa, tangalen anendaka alirtem pei pei talidaki aotsü atema anogo peria agütsütsüla, ta DALT-isa metetdaktsü.
Tang ama tensa ka nung state sorkari tongti kin teloktem nem shilem agidaktsütsüba kangasa tongtipang lir. Ajisüaka, sorkari Naga teloktem jaoka shilem magidaktsüba angudang nemjema bilemer, ta parnokisa ashi.
Sendentem nung Non-Naga teloktem jaokba nung ashishitepba onük kecha mali saka Naga teloktem mejaokbaji tebilemtsü tulu ka lir. Talisa Naga Council Dimapur (NCD) ya tashi maliba telok ka lir kechiyong NCD ketdangpurtem kümsük tembangadoker asünung, ketdangpurtem ya acha-ayangertem amai dang lir, ta DALT-ia metetdaktsüogo.
Naga teloktem yamaisa senzüka yutsüra Dimapur nung Ao Naga nungertemi state sorkar department/teloktem den amalitep kecha malitsüsa akümtsü, ta DALT-isa tebilemdangtsü olen ka ashi.