DALT-i tashiyim mapa aitsür

Dimapur, March 10 (TYO) : Dimapur nung Half Nagarjan kübok United colony nung Bodhbar nü nisung tamajunger kar arua tashiyim agi Walisa Joylong Guest House nungi sen meshia amokmerenba dang masü saka yangji inyakertem rongnung teburtem tashi khasettsü aser tetsürtem taküm raksatsütsü, ta amokmerenba mapaji kanga sashia aitsür, ta Dimapur Ao Lanur Telongjemi metetdaktsüogo.
Osang ajanga angazükba agi, tan Bodhbar nikongdang 3:30 ako shi nung nisung kar arua Town Command tenüng nung sen Rs.1000/- meshia bener ao. Iba mapangjibo kibur maliasü saka ano kasa nikongtsütsü 5:00 ako shi nung kasa nisungtemji arur sen Rs.5000 meshi aser aji magütsüra teburtem taküm samatsütsü aser tetsürtem kangshitsü, ta amokmerena liasü. Iba mapangji police-temi parnok rongnungji nisung ana apu aser ka ajen. Tenaji ka Ghukhnyi nunger Asür Hinto’er jabaso Khekishe Ayime aser kaji Litami nunger asür Ayohi’er jabaso Shiniho Chishi liasü.
Iba ama mapang nung nisung tamajunger apuba atema police nem tenüngsang agütsür aser ano jena aosangjia aputsüla ta DALT-isa metetdaktsü. Iba ama tashiyim agi sen sarua senzür anema nisung ajaki ola adoktsüla, ta parnokisa metetdaktsüogo.