Damascus bomb lendong nung nisung 40 asü, 120 yiru

Honibarnü Damascus, Syria nung taküm bendanga agütsür bomb pokloktsürtemi Shiite temeshi aieni aortem mena aliba bus nükjidong ser lendong agütsüdang raksaba bustem  noksa nung angur

Damascus, March 11 (Agencies) : Shi’ite temeshi aieni aoertem akoksatsütsü mechi nung bomb ana pokloktsüba lendong nung tajemba agi Iraq nunger nisung 40 asü aser nisung 120 yiru. Item nisungtem ya anasa aliba temeshi tesemi sarasademtsü asoshi aoerba liasü, ta Iraq foreign ministry sangdong ka ajanga metetdaktsü.
Honibarnü atalokba lendong asoshi tang tashi nung ano shinga telokia tenüng agia mali.
Iba lendong ya taküm bendanga agütsür nisung anati atalokdaktsü, ta Hezbollah-run al-Manar TV station ajanga metetdaktsü.
Syria linük TV tem nung lendong nung raksaba bus gari ana sayu. Lendong atalokba tesem nung azü aika yimshia liasü aser ali nungji tsüngsemtema prokshia lir.
Syria Tir Bashar al-Assad linük asoshi raraba mapang Iraq, Afghanistan aser Lebanon nungi Shi’ite militias temi kanga nungita yarir.
Mezüngbuba lendongji bus anendenba tesem ka nung atalok. Item bus tem ya temeshi aieni aortem iba tesem anasa aliba Bab al-Saghir leper semdangi anir aruba garitem lir.
Ano minute 10 sülen bomb tanabuba apokdang mezüng lendong nung yirur alirtem yaria aliba nisungtem aika yirusem, ta Damascus nung osangbener kati ashi.
Item temeshi aieni aoertemji temeshi tesem Sayeda Zeinab semdangba sülen leper nung sarasademtsü liasü, ta osangbener jagi ashi.