DAN legislator 42-i Dr Shurhozelie nungiter

Kohima, May 26 (TYO): State Assembly nung Chief Minister Dr. Shurhozelie Liezietsu züngsem akümtsü atema Democratic Alliance of Nagaland (DAN) Legislature Party-i mulunga agizükogo.
Hokolbar nikongdang State Banquet Hall nung DAN Legislature Party senden ka amendang DAN MLA 60 nungi parnok 42-i iba tenangzükba agi, ta CMO sangdong ka nung metetdaktsü.
Iba dak sendakba nung DAN Legislature Party-isa Election Commission of India dang tekaratiba nung Northern Angami-I Assembly Constituency indang by-election agitsü atema mepishia metetdaktsü.
May 24, 2017 nü State Lotteries & Music Task Force Parliamentary Secretary, Khriehu Liezietsu-i tebu nem lenmang lapokja, pa MLA nungi anenba sülen iba assembly menden tazüng aküm.
Taonung DAN Legislature Party senden nungsa, Centre aser NSCN(IM) tsüngda Naga yimten tebilemtsü atema ajaki mulunga aser haihaura kateta telemtetba tajung ka agira parnoki menden toktsütsü ta nangzüka aliba ama inyaktsü ta maneni bangzünga ayu.
2018 küm tetenzüklen Assembly election magidangsa küm 20 jungnüa olemtep agiyonga aruba atema telemtetba ka agitsü asoshi mapa tekaratiba nung inyakang ta India sorkar dang mepishitsü atema senden nungsa bangzünga renem.