DAN Legislature Party-i Cabinet telemtetba pusemer

Dimapur, October 18 (TYO) : October 18, 2016 nü State Banquet Hall nung DAN Legislators rongdak senden ka ayonga amendang, CCoFA-i NH 29 nokdangba indang onük benoka olemtep, ta DAN Legislature Party, Spokesperson, Yitachu-i sangdong ka nung metetdaktsü.
“Ozüng alema totzü meyoktepba inyakyim anendaktsütsü atema sorkari telemtetba agia mapa inyakba atema züngsemtemi sorkar dang pelar aser ano Chief Minister-i tanep CCoFA nungi teshimtet telok ka dang tarutsü nung Nagaland nung ozüng alema totzü meyoktepba inyakyim malitsü ta nangzükba atema pa nem tenüngsang agütsür” ta DAN Legislature Party sangdong nung shia lir.
Totzü meyoktepba onük atema bushisüngdangji tang tagidak lir, anungji Investigation Agency memelenshi tajungba, aser CBI ama Central telok ka nem bushisüngdang südaktsü nunga, parnoki mapang telatet ka nung tembanga mebushitettsü ta October 15 nü Cabinet-i telemtetba agibaji onokia pusema nungiter, ta DAN Legislature Party-isa metetdaktsü.
October 18, 2016 nü Chief Minister-i CCoFA züngsemtem den ajurutepba aser lungkak aitba sentong anentsüsa jembitetba atema CM dang pelar. Pai nangzükba ama onoki inyaktsü aser lungkak aitertemi akhangba ama asen state nung ozüng alema totzü meyoktepba inyakyim tang aser teti atema anendaktsütsü sorkari inyaker, ta parnokisa shisem.
Supreme Court-i ozüng agütsüba ama National Highways nokdangba sentong ajakji ozüngi memelaba sentong ta Cabinet-i lemtetba nung onokia pusema nungiter aser iba dak sendakba nung nisung ajaki sorkar den amalitepa yariteptsü mepishir, ta DAN Legislature Party-isa metetdaktsü.