DAN Legislature Party-i mokdangba agientsü aser olemteptsü ayongzüker

Dimapur, February 10 (TYO) : Hokolbar nikongtsütsü State Banquet Hall, Kohima nung Democratic Alliance of Nagaland (DAN) Legislature Party rongdak senden ka amendang, Urban Local Bodies indang election onük ajanga tang tensa ajurua aliba indang lemsatep, ta Media Cell, Chief Minister’s Office, Nagaland-i sangdong ka nung metetdaktsü.
Urban Local Bodies indang election dak sendakba mapa inyakba ka dang magitsü ta telemtetba agiogo aser tang joko iba dak sendakba nung olemtep aser tebilemba lemsateptsü indang mapa dang anünga lir ta tanü senden nung adenertemi jembi.
Iba nung ajemdaker DAN Legislature Party-i lungkak aitba teloktem dang mokdangba agientsü atema mepishitsü lemtet aser State Sorkari ULB onük angatettepa telemtetba ka agitsü atema olemtep alitsü ayongzükba nung adentsü atema atyongzükba agütsü lemtet, ta Media Cell, CMO sangdong nung shia lir.
DAN Legislature Party senden nung Speaker dena MLA 53 aden aser DAN Chairman & NPF party President, Dr Shurhozelie Liezietsu, DAN Vice Chairman aser BJP Nagaland President, Visasolie Lhoungu, aser MP (Rajya Sabha) KG Kenye nungertem tetushi süa jaokertem ama shilem agi.