DAN sorkari nübortem atema mapa meinyaktsür

Kohima, July 5 (TYO) : Centre sorkari Nagaland nem sen crore 2000 den tema planned budget agüjaka, Naga People’s Front (NPF)-i aniba DAN sorkari nübortem atema mapa meinyaktsür ta NPCC-i metetdaktsü.
Mongulbarnü Congress Bhavan nung NPCC Election War Room tenzükba sentong nung Nagaland Pradesh Congress Committee (NPCC) Working President, Ayangba Aonok-i iba osang metetdaktsü.
2003 küm Nagaland nung Congress sorkar alidang Centre nung BJP-i aniba NDA sorkari Nagaland state atema planned budget sen crore 375 dang agütsü, saka 2004 küm Congress-i aniba UPA sorkar aruba sülen sen crore 2000 jungnüa budget lemzüktsü, ta Ayangba Aonok-isa ashi.
Ajisüaka, Congress aser NPF sorkartem tsüngda tetsüngda tuluka itta lir, kechiyong tang teinyakdak NPF sorkari government employee nem iatsen magütsüteter aser ano terenlok mapa meinyakteter, ta paisa shisem.
Aji dang masü, tang aliba sorkar nem telok balala aser Central programme employee temi memorandum aser ultimatum tem agütsüba manener, saka NPF-i item khuret magizüker aser public atema kecha meinyaktsür, ta NPCC Working President-isa metetdaktsü.
State sorkari senotsü tim mesüiba amshiba osang ya Congress Party züngsemtemi tesem ajaklen nübortem dang sangdongtsüla. Iba dak sendakba nung All India Congress Committee nungi senotsü anguba ajanga NPCC-i Nagaland kübok District Congress Committee 11 nem gari agütsür, ta paisa ashi.
DCC ketdangsertemi pei District kübok aliba Assembly Constituency ajak asemtsü aser nübortem nem osangtsüsang metetdakja State Assembly elections 2018 atema renemshitsü ayongzüker, ta Ayangba Aonok-isa ashi.
NPCC-i Mon, Phek, Mokokchung, Zunheboto, Kiphire aser Wokha nung DCC president 6 nem Bolero gari tasen kaka agütsü aser tanüngba district temji taruba hopta ishika tsüngda agütsütsü, ta paisa metetdaktsü.
Tanü sentong nung NPCC President, K. Therie-i DCC president nem gari indang sapi aser kulikakettem lema agütsü.
Sentong nung mendenji NPCC general secretary, Dokiu Kicham liasü, Kohima Ao Baptist Arogo Associate Pastor, Temjen Sempo-i temoatsü meshia sarasadem aser NPCC general secretary, Jonathan-i anküp tepela o jembi.