DAN sorkari sangdongba osang nung tagitsü mali: NPCC

Dimapur, August 16 (TYO) : DAN sorkari Independence Day 2015 nü sangdongba osang nung tagitsü kecha mali aser iba osang nung tanü Nagaland indang rongsenren khuret benoka mali, ta Deobarnü NPCC tir, K. Therie-i sangdong ka nung metetdaktsü.
Sorkari sangdongba osang nung sentsüh crore 1426.29 odoktsü atema onük ka danga enoksema mali. Parnokisa Planning Commission agienba ajanga ongdang adokba atema inyaktsü kecha shia mali, ta NPCC tir-i ashi.
Public asoshi Planning Department ya tebilemtsü khuret ka kümogo, kechiyong parnoki tanü tashi ‘backdoor appointment’ khuret azüoktsü atema tenangzükba kecha magütsür, ta K Therie-isa shisem.
Pai ashiba agi, Nagaland nung gari lenmangtem kanga mejungi aliba atema aser ano school o mozü ki teraksatem yanglushitsü atema sorkari olen ka danga mejembir aser iba jagi parnoki teinyaktsütem meinyakba aser tebilemtsü khuret mabenba jungkai adoka sayur.
Tanü asen state nung communication timtem lir saka sorkari iba timtem anepalutsü atema sentong kecha mali. Tanü alima nung high speed internet amshiteper saka Nagaland nungbo 2G ang amshitsüsa tesüleni atsünga alur, ta NPCC tirisa metetdaktsü.
Paisa ashiba agi, 2014-15 tsüngda MGNREGA inyakyim nung 9.6% man days dang liasü ta DAN sorkari osang metetdaktsü. Job card holders lakh 4.15 nungi sen 160 bendenra, sen crore 664 tashi aazüktetla, saka sorkari crore 64 dang aazüktet.
DAN sorkari Independence Day 2015 osang prokshiba nung nübortem teimla ayutsüsa kecha mali, kechiyong iba nungji tenangzükba aser teimla yutettsüsa onük kecha benoka mali, ta K Therie-isa sangdong nung metetdaktsü.