DAN yimsüsüba nung tatartem ola madokdaktsür

Dimapur, June 12 (TYO) :  Tang Nagaland nung NPF teloki aniba DAN sorkar nung tatartem ajak tetsübu agi ola madoktetter, kechiyong  parnokji leniri alena ayur ta tanü osangbenertem den jembidang, Independent MLA Thomas Ngullie-i metetdaktsü.
Kechi atemasa ola madoker ta metetnüa asüngdangdang, Nagaland kecha nung terenlok mapa inyakba mali aser bendangertem Nagaland-i nungoka aitba indang shingaia kecha mejembir. Ni yimten  nung shilem agir joko küm 35 ajunger aser ni kodanga tang sorkar amaibo mengudang ta Thomas-isa ashi.
Paisa  par medemer tatartem dang state nung nübortem nüngdak asoshibo ola adoktsüla aser mapa küma inyaktsüla, aji mesüra asüng lanu putui asenok aitsütsü ta metetdaktsü.
Paisa Nagaland nung bendangertem nungoka aitba lendong nungi kümzüka nokdangtettsü asoshi Assam nung ama Nagaland nunga National Register of Citizens sentong tenzüktsüla ta metetdaktsü.
Thomas Ngullie-isa pai tawa Chief minister tazüngba kuli tiyazü amshiba ken o nung aija metetdaktsübaji shitak lir aser tanga pai jembiba ken o nung masetshii nokdaka lir, anungji T.R.Zeliangi pa tazüngba kaket bener arua sayutsüla ta nenshia metetdaktsü.
Iba ken o ya okadak lir asünungji iba obendangji atatsüla ta ashidang, pai pa azüngba kaket shitak sayutetra okadak ken o benoka jembitsüsa madoktsü ta Thomas-isa metetdaktsü.
Pai okadak ken o ji miimbanga yuner, iba jagi nübortemi ola adokaka pai kecha telangzüba magütsür saka pai talangkabo moutettsü. NPF leniria paji awabanga mayutsüla ta Thomas-is ashi.
Tanü Nagaland nung Naga nunger ajaki akümtsübutsüsa lenir tajung ka nüngdaker, iba jagi dang Nagaland-i yimjung bener arutettsü ta paisa ashi.
Nagaland nung taoba election nung adokba Thomsa Ngullie dak alaka  Independent ajak NPF teloki aniba DAN  sorkar nung dena lir.