DAN yimsüsürtemi FNR nem yimten khuret bendaktsüner

Kohima, May 10 (TYO) : Nagaland nung NPF teloki aniba Democratic Alliance of Nagaland (DAN) yimsüsürtemi Forum for Naga Reconciliation (FNR) telok dang Naga yimten tebilemtsü ken o latettsü asoshi maneni lenmang bushia inyakdaktsüner ta temepishiba ken o ka metetdaktsüogo.
Yashi Hombar nü Kohima nung DAN yimsüsürtem senden ka amenba mapang, Naga yimten tebilemtsü ya ajaki agizüktettsüsa telatetba kati arutettsüsa FNR telok dang ano maneni shilem agia inyaktsü mepishitsü lemtet.
FNR teloki Naga nunger linük nüchiso bushir telok balala ajak tangatetba ka nung India sorkar den Naga yimten ken o süoka jembir telatetba kati arutsü asoshi bendanga agüja inyaka liasü. Ajisüaka, yaküm 2015 küm August asem nü NSCN-IM o India sorkar na tsüngda ‘Framework Agreement’ renemba sülenbo FNR teloki inyakba osang mangashir.
Tang tashi nungbo Naga nunger yimten telok balala küma lemsar tsükchitepa liasüba tensa tia anendaktsür parnok telok ka küma melongjemtetaka yimjung nung tangatettep nung alitsü aser India sorkar dena yimten ken o külemi jembitsü tashi mulungtepa renemer liasü.
Ano, maneni FNR telokisa Naga nunger yimten telok ajakji tangatettep kati bener arur India den Naga yimten tatem küma latettettsüsa tanen makai meranga inyakdaktsüner ta temepishiba ken o ka metetdaktsü.
Ano, kasa senden nungsa DAN yimsüsürtemi yaküm NSCN-IM o India sorkar na tsüngda August 3 nü ‘Framework Agreement’ yangluba onük nung maneni nungiter ta pangzünga ka renemogo.
Ano, kasa senden nungsa DAN yimsüsürtem ajaki Chief minister, T.R.Zeliang lenisüba nung maneni DAN sorkar tashi itta aotsüsa inyaktsü lemtet.