Dangal film ajanga Aamir Khan kinüngtsü Kiran nüma atanger

New Delhi, March 17 (Agencies): Actor, Aamir Khan-i nüngtugu melangteper, Mahavir Singh Phogat taküm otsü nung ajemdaker yangluba ‘Dangal’ film atema kanga meranga inyakogo.

Iba film nung Aamir-i Phogat tanur asüba mapang aser tain naprong indang shilem agir. Pai tain shilem agitsü atema temang touzük seret 90 tashi kümdaktsü aser tang seret 70 tashi anizüktsü atema merangdar.

Aamir-i Dangal nung shilem junga agiba ajanga pa kinüngtsü, Kiran Rao kanga nüma atanger. Rao-i Dhobi Ghat film nung Aamir direct süa liasü aser lai, Dangal production ajanga la kanga nüma atanger, ta shiogo.

Kapoor And Sons sentong nung Kiran Rao-i, “Ni kanga pelar aser kanga nüma atanger. Tang iba film ya edit südar. Iba ya temulung shirangtsü film ka lir. Iba otsü ya tebu ka aser par jalatem otsü lir,” ta ashi.

Saisapong film, Dangal ya Nitesh Tiwari-i direct asü.

Iba film nung Mahavir Singh Phogat ama shilem agisang Aamir-i lar jala ana- Babita Kumari aser Geeta Phogat na dang melangteptsü sayur. Geeta ya 2010 Commonwealth Games nung takok angur mezüngbuba India tsür lir. Commonwealth Games nung lai gold medal (55kg) angu aser Babita-i silver (51kg) angu.

Dangal film ya taküm December 23 nü sayatsü.