Dani Alves-i PSG den otsü tasen yangluner

Paris, July 13 (Agencies): Brazil nunger asayar Dani Alves-i Paris Saint-Germain den Champions League koka otsü tasen ka yanglutsü asoshi tejangraba lemsatepogo.
Alves ya PSG pur atema iba season transfer window nung tanabuba asayar aniokba lir aser pa club nung adenba osang Bodhbarnü metetdaktsü. Pa taoba hopta Juventus toktsüba sülen küm ana atema PSG nung denogo.
Arishi küm 34 tain asayar ya Barcelona nungi asayadang Champions Leagues asem aser La Liga titles trok, ta kokogo.
Pa Manchester City-i alitsü asoshi meranga liasü saka pai magizüki PSG den aden. PSG puri pa sen euro million 14 yong alizükogo, koba City puri anaben agi tali agütsütsü asoshi molunga liasü.
“Ni Manchester City nungi dang masü saka England nung tanga club kecha nungi masayaner. Ni yangi medemer lir aser kü kinungtsüi iba yimti nung linüba yong ni iba telemtetba agi,” ta Alves-i ashi.
“Guardiola-i mepelai bilema lir kü dang tai tokang. Manchister City puri kü telemtetba nung tezüdanga bilema lir kü dang taitokang,” ta paisa ashi.
Pa season ka Juventus nung asayaba mapang par teloki Serie A aser Coppa Italia akokba aser Champions League final tongtetba nung shilem tajung agia liasü.
“Onok nükjidongji Champions League akoktsüba lir aser iba dak rangloker team kanga tashi tait ka yangludar. Ni iba club den otsü tasen ka yangluner, kechiaser iba club-i tang tashi nung Champions League khen danga koka mali. Ni nükjidong tulu yuner aser iba ajanga ni in iba club nung aden,” ta Alves-i ashi.
Taoba hopta Real Sociedad nungi Spain nunger left-back Yuri Berchiche club nung adenba sülen pa denogo.