Daniel Craig-i James Bond ama shilem agitsü akok

New York, October 9 (Agencies) : Actor Daniel Craig-i James Bond franchise-i meyipa arua ano film kar nung shilem agitsü olen ka shishiogo, ajisüaka pa iba film nung shilem agitsü atema sen million dollar 150 agütsütsü ta olulu jembiba pai aitsüogo.
James Bond franchise nung pa tanaben arua shilem agitsü asü magitsü ta kanga bulua jembiba mapang ka nung pai, James Bond film tem nung shilem maneni agitsü akok, ta New Yorker Festival nung jembidang ashiba dailymail.co.uk osang ajanga metetdaktsü.
“Bond film tem nung inyakba ya ni atema alima nung mapa tajungtiba lir. Ni Bond movie tem nung inyakba mapa balala mesüka tanga mapa ka danga mali. Ni Bond film nung shilem agiba anen nungbo ni iba telok kanga menungratsü,” ta pai ashi.
“Actor ka atema Bond film temji jangratemtsü film tem lir. Ni iba mapa ya kanga meimer. Ni yangi shilem agiba ajanga kanga jangra atemer. Anungji ni jangratemer ni maneni shilem agitsü,” ta Craig-i shisem.
Bond film ana nung shilem agitsü atema pa nem sen billon dollar 150 agütsü atema sign sütepogo ta asüba oluluji teyazü lir, ta pai ashi.
Bond film ano ka nung shilem agitsü melena teben nung azüjajaba tezü ang ka rangdangtsü ta Craig-i ashiba sülen osangbenertemi pa joko Bond film tem nung shilem magitsü ta sangdonga liasü.
Arishi küm 48 tain, Craig-i, comedy film  “Logan Lucky” nung shilem agia lir aser pai Bond shilem kanga pelaseta agir, ta ashi.