Danielle Canute-i ‘India’s Next Top Model’ takok nguogo

Mumbai, September 28 (Agencies) : India nung mezüngbuba reality TV show “India’s Next Top Model” nung Danielle Canute-i takok nguogo.
Mumbai nungi arishi küm 18 tain Danielle Canute ya tetoktepertem rongnung tanutsüla liasü aser lai final nung Gloria Tep aser Rushali Rai na den toktep.
Danielle-i takok anguba sülen o jembidang, lai iba takok angutsü asoshi teimla maliasü saka lai merangba ajanga takok ngudaktsü ta ashi.
La ya St Xavier’s College, Mumbai nung BA second year student lir aser tetoktepba tenzükba mapang mezüngbo la ya kanga dang aakmesen liasü.
Ajisüaka, la tetoktepba nung shilem agia arudang aakmesen melii aküm aser takok aika nguyonga aru.
MTV-i ayongzükba “India’s Next Top Model” sentong lennirji model-actress Lisa Haydon liasü.
Tetoktepertem rongnung nü asoshi shiba tajungba liasü ta asüngdangdang, Danielle-i “Ibaji Gloria liasü, saka ni la kanga menungratsü, kechiyong la kü room mate liasü aser ano lai kütsü ama ni anepalu” ta langzü.
Lai takok korang anguba atema Bling talent management agency den küm ka contract, Graiza magazine nung spread ka aser Tresseme India atema online face inyaktsü maongka balala nguogo.
Danielle-i Lisa aser British supermodel Cara Delevingne na kanga sakloker aser lai tanga model tem ama film nung shilem agitsü mebilemer.
“Ni tangbo acting atema memerangtsü. Ni modeling nung dang temulung agütsünür aser tanga mongintem ama jenjang tajung ngunür” ta lai ashi.
2003 nung Tyra Banks-i American reality television series “America’s Next Top Model” ajizüka “India’s Next Top Model” ayongzük.
Iba sentong nung tetendangertemji Lisa aser Dabboo Ratnani na liasü aser Anusha Dandekar-i shisalen sayu.