Dantewada amakba nung Naxal 100-i shilem agi

Raipur, April 10 (Agencies): Chhattisgarh kübok Dantewada district nung BJP MLA aser sepai 4 tepsetba mapa nung Naxal 100 shi kati shilem agi ama temulung malemer ta police ketdangser kati tanü ashi.
Iba tesem nung police-i Naxal indang GPS device ka ngutetogo. Iba ajanga telungpurtemi Improvised Explosive Device (IED) pokdaktsü.
Dantewada nungi BJP MLA Bheema Mandavi den par security staff pezü tashi Mongulbarnü Shyamgiri yimtsüng anasa IED ka ajanga pokset.
“Iba inyakyim nung prangpong-injang abener Naxal 50 nungi 60 shi ka dena parnok nisung 100 shi kati shilem agiba osang onoki angazükogo. Parnokji commander tem Deva aser Vinod na lenisüba kübok liasü” ta Dantewada Superintendent of Police Abhishek Pallava-i ashi.
Ozüngi noktanga aliba CPI (Maoist) indang Malangir area committee den Kerlapal area committee aser Jagargunda area committee nungia züngsem kari iba mapa inyak, ta paisa ashi.
Iba tesem nungi 9 MM pistol ka den rifle ana samaogo. Mezüng bushisüngdang ajanga angazükba agi iba ya jelia tasa atonger inyakba ama ajiteter. MLA atema sang yanglur pa tepset ama bilemer, ta Pallava-isa shisem.
Iba tesem ya taoba anogo pungu tsüngda anaben tashi District Reserve Group (DRG)-i mita ao saka IED ji anogo ka nung dang rema yutsütsü akok, ta SP-isa metetdaktsü.