DAO Dimapur-i nung Singrijan ‘Farmers Field Day’ ayongzüka agi

November 17, 2015 nü Dimapur DC,  Kesonyu Yhome, IAS-i Singrijan nung ‘Farmers   Field Day’ sentong nung o jembiba angur.

Dimapur, November 17 (TYO) : November 17, 2015 nü District Agriculture Office Dimapur-i Singrijan yimtsüng nung Farmers Field Day ayongzüka agi.
Iba sentong ya National Food Security Mission(NFSM) kübok ayongzük aser tetushi süa jaokerji Dimapur Deputy Commissioner, Kesonyu Yhome (IAS) liasü.
Sentong nung Kesonyu Yhome-i o jembidang, aluyimertemi Agriculture department ajanga aluyimba tasa tasen sayuba angazüktsü aser benshitsüla, ta ayongzük.
Asen tetsü-tebou nunger mapang osettsüset peria maliasü saka parnoki meranga inyakba ajanga taküm liyonga aru. Tanü alima nung aluyimertem kanga agi tajemba kümogo saka technology tasen ajanga tsünüsenbongtsü timba züinteter, ta paisa ashi.
“Asen state nung aluyimertem kanga ajema kümogo aser iba jagi tsünüsenbongtsü peria monguteti tanga state tem nungi bener arua achir. Anungji Agri department-i teyari agütsüba aser inyakyim tasen sayubatem angazüka benshitsüla aser iba jagi asenok ajangzüktsü” ta Dimapur DC-isa aluyimertem ayongzük.
Sentong nung Deputy Director, Agriculture Department, Kohima, Sosangmar-i o jembidang ashiba agi, Farmers Field Day ya aluyimertem atema tongtipang anogo ka lir.
“Field Day melira NFSN indang nükjidong matongtsü. Aluyimertemi jangrabangra arura Agri aser Allied departments-i yariteptsü atema arutsü” ta paisa shisem.
Sentong nung APP, Dimapur L. Mongsanger-i NFSM indang osang tatsü agi metetdaktsü aser aluyimertem tenüng nung Singrijan Village nungi Tik Bahadur aser Shozukhu Village nungi Hotoshe Sumi nati o jembi.