Dao Division Security Forces-i CorCom telungpur 3 apu

Kohima, Metsüremi/March 06 (TYO): March 05, 2019 Mongolbarnü Security Forces-i Coordination Committee (CorCom) nung densema aliba Kangleipak Communist Party (KCP) telok nungi Self Styled Private Yumnan Albert Singh den Self Styled Private Hedangmayum Benarji aser Sharma Kanglei Yawol Kanna Lup (KYKL) nungi Self Styled Private Samulailakpam Rajesh Sharma pua liasü, ta osang ajanga metetdaktsüogo.
CorCom telungpurtem India arrtsü alema aitsü asalentong yangluba osang tejangja ka nung ajemdaker Security Forces-i telungpur asem pua liasü.
Telungpur asem ya Changlang District, Myanmar kübok Nampong circle ajanga India-i aitsü merangdang sepaitem nem pudaktsü.
Indo-Myanmar arrtsülen telungpur maitdaktsütsü aser iba tesem nung yimjung lidaktsütsü atema Dao Division kübok Security Forces-i metitemi south Arunachal Pradesh tesem mita liasü.
Sepaitemi telungpur asemprongla apuba sülen parnok dang asüngdangyaba mapang par asem yagi CorCom kübok telok balala nung shilem agiba indang shia liasü.
2017 January aser June ita nung Yumnan Albert Singh aser Hedangmayum Benarji Sharma nati KCP telok nung dena liasü. KCP telok nung Albert aser Sharma naprongla züngoksemba sülen KCP camp nung ita asem tashi tena prangbong aser injang amshiba nung training agi.
Kasa küm August ita nung Samulailakpam Rajesh Sharma-i KYKL telok nung aden aser pai KYKL camp nung ita asem atema prangbong aser injang amshiba nung training agia liasü.
Indo-Myanmar arrtsülen telungpur mima aitaba nokdanga aser azüoktsü atema south Arunachal Pradesh tesem nung Security Forces-i mapang shia sepaitem yoka mitdaktsür.