Darjeeling nung bomb apok; GJM lennir 3 anema ken o benok

Kolkata, August 19 (Agencies): West Bengal Police-i Honibarnü Gorkha Janmukti Morcha (GJM) tir Bimal Gurung aser tanga GJM lennir ana anema ken o ka benokogo.
Darjeeling jila tiyongtsü nung aliba Chowk Bazaar nung Honibarnep züngia bomb ka apokba dak sendakba nung parnok anema Unlawful Activities (Prevention) Act (UAPA) kübok ken o ji benok.
Bomb lendong nung nisung asüba mesüra yirubabo mali, ajisüaka iba tesem nung dokantem kishitem raksa. Yasüng ayaterm sülen sepaitemi iba temeket mita senzüdang bomb ji apok.
“Onoki mezüng bushisüngdang asüdang, improvised explosive device ka amshiba kuli kar nguogo. Iba dak sendakba nung bushitepa aodang Bimal Gurung, Pravin Subba aser Prakash Gurung nunger tenüngtem tetshi. Parnoki iba mapa nung shilem agir alitsü akok ta onoki temulung melemi bilemer” ta Darjeeling Superintendent of Police, Akhilesh Chaturvedi-i osangbener dang ashi.
Darjeeling kübok Phoolbazar nungi ita ka tejakdang gelatin sticks auya bener ao aser tanep apokba bomb nung itemji amshir alitsü amai lir, ta Chaturvedi-isa ashi.
“Anti-Gorkhaland purtemi bomb pokdaktsü ama onoki bilemer. Darjeeling hills tensa atema olemtep alitsü mejangrartemi iba mapa inyak asütsü akok” ta GJM lennir Swaraj Thapa-i osangbener dang ashi.
Iba mapa nung GJM shilem kecha mali, ta Thapa-isa shisem.
Darjeeling hills mokdanger anogo 66 buba nung bomb lendong ya atalokogo.