Darjeeling nung mepetmesü ya Mamata ajanga lir: Centre

New Delhi, July 21 (Agencies): Tanü Centre sorkari, Darjeeling nung mepetmesü adoka aliba ya West Bengal Chief Minister, Mamata Banerjee tai ajanga lir, kechiyong lai iba onük atema junga meinyak, aser tenemlen alirtem jashidaktsü, ta ashi.
Lok Sabha senden nung Parliamentary Affairs Minister, Ananth Kumar-i, iba tesem nung tesünep aliba sülen ang telok asem- Centre, state aser Gorkhaland Territorial Administration (GTA) tsüngda ken o jembitettsü, ta ashi.
Zero Hour mapang nung CPI-M nungi Mohammed Salim-i iba onük süokba sülen minister-i iba sangdong agütsü.
Minister-i, Banerjee-i la melungka agi oshi (Bengali) benokner aser tenemlen aliba nüburtem ketdangsüba maparen nung amoshiner, ta aitsü.
Salim-i, iba onük atema Centre sorkari ola madoki malitsüla saka telok asem tsüngda senden ayongzüktsüla, ta takhangba agütsü.
Paisa Centre dang, “Nenoki chief minister dang linük temzüng nung aliba ama inyakang, ta ashitsüla,” ta metetdakja liasü.
Ajisüaka tanü senden nung Mamata’er party, Trinamool Congress züngsemtembo kata maliasü.