Darjeeling nungi Central sepaitem agientsü atema SC-i melar

New Delhi, October 27 (Agencies): West Bengal nung Darjeeling aser Kalimpong district na nungi central paramilitary company tenet agientsü atema Hokolbarnü Supreme Court-i Centre sorkar nem temelaba agutsüogo.
Iba state nung Gorkhaland state takhangba agutsüdang tensa mejungi akumba nung ajemdaker Central sepai aika yoka liasü.
Chief Justice Dipak Misra, Justice A.M. Khanwilkar aser Justice D.Y. Chandrachud nungeri akumba bench-i Centre sorkar dang, Himachal Pradesh aser Gujarat assembly election nung amshitsü atema West Bengal nungi Central Armed Paramilitary Forces (CAPF) company 7 agientsü atema tetuyuba agutsü.
Calcutta High Court-i hills district nung central paramilitary forces company 15 nungi company 10 agientsü telemtetba sota ayuba anema Centre sorkari temepishiba ka agutsüba dak sendakba nung Supreme Court bench-i West Bengal sorkar dang nungi telangzüba meshiogo.
Supreme Court-i maneni Centre sorkari mepishiba ken o ya November 27, 2017 nü angadangtsü lemteta ayu.
Interim order ka ajanga October 27 tashi Darjeeling hills nung CAPF sepaitem magieni atatsü asoshi High Court-i tetuyuba agüja lir.
Gorkha Janmukti Morcha-i anir Darjeeling nung Gorkhaland atema takhangba agütsüba mapang nung West Bengal sorkari Centre dang security meshia liasü. Iba temepishiba nung ajemdaker Centre-i CRPF aser Sashastra Seema Bal (SSB) company asem yok, aser maneni sepai tali yoka tang state nung CRPF company 12 aser SSB company asem lir.
GJM-i anogo 104 shi longkak aitba sülen Union home ministry-i CAPF company 15 nungi company 10 agientsü telemtetba agi, ajisüaka Chief Minister, Mamata Banerjee-i Darjeeling nung ano tensa mesüngjem, ta shia ibaji magizük.