DAST Sobaliba shisatokten sentong agiogo

Sobaliba Shisatokten sentong nung shisalsen agütsürtem den sentong nung shilem agirtem aser DAST lenirtem tangokba noksa nung angur.

Dimapur, Mongputeni/October 8 (TYO): Diphupar Ao Senso Telongjemi ayongzüka October 8 nü “Sobaliba Yimsoshi” Nükmen nung ajemkdaker Sobaliba shisatokten sentong ka ayongzüka agiogo. Iba sentong ya tanü Golden Jubilee Nüngo ki, Ao Baptist Church Diphupar nung agia liasü.
Tanü sentong ya Wb. Enyar Jamir, Sp. Aliba Longchari aser Wt. Lanusenla Ao nunger lenisüba kübok agi aser Pastor, ABCD Wb. N. Lipok Jamir-i temoatsü meshia sarasademer tenzük. Sentong nungsa DAST tir Wb. T. Maong Aier-i lokti pelaa agizükba o jembi aser Tsürabur Repanungsang lenisüba kübok Menungra bilemtetba sentong agia liasü.
Anogo tepeyong agiba sentong ya shilem pongu küma lemsar agia liasü. Sentong nung shisalen agütsür, Ao Senden Literature Board (ASLB) Tezülur Wb. I. Temjen Tzüdir, Wb. Supu Jamir, Advocate aser Assoc. Prof. DBC, Dimapur, Wt. Narola Walling nungeri Sobaliba Yimsoshi Otsüdong, Arju Tsüngi, Tsüki Tsüngi, Putu den Tsüngkang Medema aser Akhi Atsüngakang aser Tanü Putu onük nung ajemdaker tangazükba balala agüja liasü.
Shisalsen agütsürtemi taoba mapang asen sobaliba inyakyim rateta ashiba den tanü asüng putu den peta asen sobaliba koda jangyu medema benshiyonga aotsü, iba indang teratet tejangja agüja liasü.
Iba sentong nung Diphupar nung alir Aoer tem ajak agi parnok 250 shi kanga temoatsü ngua denogo. Sentong tatemi Wb. A. Akum Longkumer Tayonger, Sobaliba Shisatokden Luden-i tepela anküp o jembi aser Wb. T. Jongpong Lemtur, GB-i sarasademer sentong tembanga liasü.