Data atema tetoktepba maneni alitsü; Jio indang angati sentong atsülangtsü akok

New Delhi, April 26 (Agencies): Reliance Jio ajanga sentong balala maneni yangluba ajanga 2018 küm data atema tetoktepba kasa alitsü, ta osang ka ajanga ashi.
Shilem 15 agi timba kümdaktsütsü nükjitong nung Jio ajanga jenjang kanga agi tajemba aser ‘complimentary’ sentong balala ya ita 12 nungi 18 tashi maneni agütsütsü, ta osang kaket ka nung shia lir.
Iba sentong ajanga tanga network amshirtema dak maneni kongshitsü
“Jio-i taoba küm tatemlen nungi agütsüba sentong balala ajanga Bharti Airtel, Idea Cellular aser Vodafone India indang Average Revenue Per User (ARPU) sen 300 tashi dang kümdaktsüogo,” ta osang nung shia lir.
Jio indang network toluba kümdaktsütsü nükjitong nung iba network ya tesem talila lakh 1 nung amenloktsü sentong yangluba mapang lir.
Reliance Jio ajanga iba angati 4G service ya 2016 küm September 5 nung saya aser iba network amshir ya anogo 83 nung nisung million 50 dak tali aküm aser anogo 170 nung züngsem million 100 ajung. Iba ya anogoshia züngsem akümer lakh 6 amai adoker.
Iba company ajanga April 1 nungi tenzüka sen agir saka Jio Prime sentong dena lir.
Jio Prime nung züngsemtsü asoshi khen atema sen 99 agi züngsem akümer aser ita shia taa agütsütsü asoshi sen 303 nungi tenzüka sentong balala agütsür. Jio Prime züngsempur asoshi ita shia sen 309 agitsü sentong ka company ajanga sangdong.
Reliance Jio sayaba ajanga India nung telecom company temaba jenjang nung alir asem tashi kanga akoksadaktsüogo, ta osang ajangasa ashi.
Taoba küm September ita nung iba angati sentong ya ita 6-shi asoshi sayaba sülen linük nung data agiba nung shilem 55 bo Jio indang liasü.