David Beckham-i BBC documentary film nung tongti shilem agitsü

 

Los Angeles, October 27 (Agencies): England nunger football asayar mongin, David Beckham-i ‘David Beckham: For the Love of the Game’ ta ajaba documentary film nung tongti shilem agitsü renemba osang ka Variety-i metetdaktsüogo.

British Broadcasting Corporation  (BBC) teloki ketdangsüa yanglutsü renemba minute 90 talang film nung Beckham-i alima continent 7 tashi nung football asaya shilem agitsü renema lir.

Arishi küm 40 tain Beckham-i Papua New Guinea nungi tenzüka, Nepal, Buenos Aires, Djibouti, Miami aser Antarctica nunger semdanga par nüburtem den football asaya iba film nung shilem agitsü renemer lir.

Beckham-i pa lanuwa tembar, Dave Gardner anisemer iba film yanglua alima tesem balalaji sema nüburtem indang sobaliba angazükba den külemi, parnoki kechisarena ajunga nung takok ngua pei alizüng ajangzüktsü merangba tendanga senzütsü sentong remena lir.

Iba senzübarenji Beckham-i par Manchester United telok tenüng nung football tesüsa toktepa asayadak, Old Trafford nung tembangtsü.

“Ni iba documentary film yanglutsü mangdang ozü medemertem den lemsatepa liasü saka iba mangdang ya asangsang nung ajangzüktsü tabo mebilem. Iba documentary film yangluba ajanga football asayatsüren nung shilem agiba ajanga bener arutsüba tajangzük balala alima dang sayutettsü,” ta  Beckham-ia metetdaktsü.

Yaküm, 2014 küm BBC telok atemasa yangluba ‘David Beckham into the Unknown’ documentary film densema, Beckham-i tan agi BBC telok asoshi tanabuba documentary film yanglur asütsü.