David Beckham UN nung o jembidang temulung raksa

September 25, 2015: Brihostibar nü United Nations headquarters nung Unicef-i tanur nem tashi agütsütsü asoshi tentettsüba, ‘Voices of Youth’ sentong lapokba mapang o jembidang, tesüiba mapang football asayar, David Beckham temulung kanga raksaa liasü.
Taoba mapang England captain, Beckham ya Guy Ritchie-i yangluba adventure film “Knights of the Roundtable: King Arthur” nung shilem agiba angutsü. 2013 nung Philippines nung tzü yipru (typhoon) ajanga arishi küm 4 tetsür tanur ka asüba indang jembiba mapang pa kanga temulung raksaa alisü.
Pai, iba otsü ya ajanga kü dak kanga kongshi, ta ashi.
“Ni Philippines nung kibong ka den ajurutep — tebu, tetsü aser jala ana, Venus aser Viana-parnoki tatalokba otsü kanga shinüa liasü,” ta aceshowbiz.com-i ashi.
“Iba yipru tesashi aruba aonung par kibong ya tsüngpang nung tua jenok. Tetsü kanga anisetba agi tebu dang jala Viana khen reprangtsü ashi. Anungji tebui melenzüka la azüit. Pa teben ka ka agi Venus aser Viana na azüpang. Tia makai yipru tesashi jagi tebu tsüngpang nungi tsükdaktsü,” ta Beckham-i ashi.
Iba otsü ya kanga temulung shirangtsü ka lir, ta pai shisem.
“Tebuji ghonda trok lir ang shia arudang par jala ka pai azüa liasü. Anogo anashi lir külen parnoki Viana angu saka tia makai la süadoker liasü,” ta Beckham-i ashi.
Iba sülen pai, Unicef-i ki aser school süshitsüba mapa tajung indang lemsatepa liasü.
“School süshitsüba ajanga Venus aser tanüngba tanurtem asoshi akhi ama kaketshisatsü angutsü lenmang lapoktsü. Iba tatalokba yagi ni kodanga metoktsür,” ta ashiba mapang Beckham nüktzü alua liasü.
Beckham ya Unicef Ambassador ama shimer joko küm 10 jungogo aser pai, “Ni tanur junga ainba lima ka aginer, kong rara, meputep, sensak tia aser tashidak mali,” ta ashi.